Andrúmsloft

Mikilvægt er að haga orkuvinnslu fyrirtækisins á þann veg að hún fari fram með sjálfbærum hætti og takmarki losun gróðurhúsalofttegunda.

Losun gróðurhúsalofttegunda vegna starfseminnar má að stærstum hluta rekja til orkuvinnslu með jarðvarma eða 68% og losunar frá uppistöðulónum vatnsaflsvirkjana sem var 29%. Önnur losun var vegna brennslu eldsneytis, urðunar úrgangs og losunar á SF₆ gasi frá rafbúnaði, sem var samtals um 3%.

Vatn og jarðvegur

Markmið Landsvirkjunar er að nýta auðlindirnar á sem hagkvæmastan hátt en draga jafnframt úr losun mengandi efna út í umhverfið. Fyrirtækið rekur tvær jarðvarmastöðvar á Norðausturlandi, Kröflustöð og Bjarnarflagsstöð, og stundar jafnframt rannsóknir vegna virkjanaframkvæmda á Þeistareykjum, fyrirhugaðrar stækkunar Kröflustöðvar og nýrra virkjana í Bjarnarflagi og Hágöngum. Árið 2015 voru 5.099 þúsund tonn af gufu notuð til að vinna 497 GWst af raforku á Mývatnssvæðinu. Fráveituvatnið frá jarðvarmastöðvum inniheldur þungmálma í litlu magni, þar með talið arsen, og næringarefni sem eiga að stærstum hluta uppruna sinn í jarðhitavökvanum. Sé styrkur efnanna of mikill getur yfirborðslosun haft áhrif á grunnvatn og lífríki. Samkvæmt starfsleyfi Kröflu- og Bjarnarflagsstöðvar er heimild fyrir losun á þétti- og skiljuvatni frá stöðvunum svo lengi sem styrkur mengandi efna í grunnvatnsstraumnum er undir umhverfismörkum. Árlega eru gerðar ítarlegar mælingar á grunnvatni á þessum svæðum til að vakta möguleg áhrif á frárennslisvatn frá stöðvunum. Styrkur arsens í grunnvatnssýnum sem tekin hafa verið árlega við Vogaflóa og Langavog hefur alltaf mælst undir umhverfismörkum I.

Úrgangur

Landsvirkjun leitast við að draga úr magni úrgangs sem fer til förgunar og auka endurvinnslu og endurnýtingu á úrgangi sem til fellur í starfsemi fyrirtækisins. Allur úrgangur er flokkaður og magn hans skráð. Magn úrgangs getur verið afar breytilegt á milli ára og fer að stórum hluta eftir umfangi viðhaldsverkefna ár hvert. Úrgangi vegna starfseminnar má skipta í þrjá hluta:

• Úrgangur til endurvinnslu eða endurnýtingar
• Óvirkur úrgangur
• Úrgangur til förgunar

Heildarmagn úrgangs árið 2015 var rúmlega 163 tonn. Þar af voru 120 tonn sem fóru til endurvinnslu og endurnýtingar, tæplega 43 tonn fóru til urðunar og tæpt tonn var óvirkur úrgangur.

Útgefið efni

Landsvirkjun leggur ríka áherslu á að þekkja þau áhrif sem starfsemi fyrirtækisins hefur, á umhverfi og samfélag. Mælingar og rannsóknir fara fram ár hvert og með áralöngum athugunum má sjá þau áhrif sem starfsemin hefur yfir lengri tíma. Hér fyrir neðan er að finna skýrslur um losun frá starfsemi Landsvirkjunar árið 2015 út í andrúmsloft, vatn og jarðveg. Rannsóknirnar eru unnar í samstarfi við háskóla, rannsóknarstofnanir og sjálfstæða sérfræðinga. Með því að smella á heiti skýrslunnar má nálgast rafrænt eintak hennar.